ශ්රී ලංකන් ගුවන් සේවිකාවකට පහරදී තුවාල සිදු කළ අරාබි ජාතිකයාට සිර දඬුවම්
ශ්රී ලන්කන් ගුවන් සේවයට අයත් ගුවන් යානයක් තුළදී ගුවන් සේවිකාවකට පහරදී තුවාල සිදුකර බිය ගැන්වූ බව කියන සිද්ධියක් සම්බන්ධයෙන් අත්අඩංගුවට ගෙන අධිකරණයට ඉදිරිපත් කිරීමෙන් පසු වරද පිළිගත් සවුදි අරාබි ජාතිකයෙකුට මාස 3ක සිර දඬුවමක් නියම කළ කොළඹ ප්රධාන මහෙස්ත්රාත් අසංග එස් බෝදරගම එම දඬුවම අවුරුදු පහකට අත්හිටුවන ලෙස අද(3) නියම කළා.
පහරදී තුවාල සිදුකිරීම, බිය ගැන්වීම ඇතුළු චෝදනා තුනක් යටතේ ගුවන් තොටුපොළ පොලිසිය මගින් විත්තිකරුට එරෙහිව චෝදනා ගොනු කර තිබූ අතර එම සිර දඬුවම්වලට අමතරව විත්තිකරුට රුපියල් 10,000ක දඩ මුදලක් නියම කළා.
සිද්ධිය සම්බන්ධයෙන් කරුණු දක්වමින් ගුවන් තොටුපොළ පොලිසිය අධිකරණය හමුවේ කියා සිටියේ, ඉකුත් ඔක්තෝබර් මස 26 වන උදෑසන සවුදි අරාබියේ රියාත් නුවර සිට කටුනායක ගුවන් තොටුපළ දක්වා පැමිණෙමින් තිබූ ශ්රී ලන්කන් ගුවන් සේවයට අයත් ගුවන් යානයක් තුළදී එම පහරදීම සිදු කර ඇති බව ද විමර්ශන නිලධාරින් අධිකරණයට කරුණු දැක්වූවා.
අදාළ ගුවන් යානය කටුනායක ගුවන් තොටුපළ වෙත ගොඩ බැසීමට සූදානම් වන අවස්ථාවේදි වින්දිත ගුවන් සේවිකාව ආසන පටි පැළඳ ගන්නා ලෙස සියලුම මගීන්ට දැනුම් දී ඇති බවත් ඒ අවස්ථාවේදී විත්තිකාර පුද්ගලයා එම උපදෙස් නොසලකා හරිමින් අදාළ ගුවන් සේවිකාව සමඟ බහින් බස්වීමක් ඇතිකර එම පහර දීම සිදු කර ඇති බවද විමර්ශන නිලධාරියා වැඩිදුරටත් කරුණු දක්වමින් අධිකරණයට දැන්වූවා.
