මිල්ටන් සුළි කුණාටුව ෆ්ලොරිඩාවට ඇතුළු වෙයි

වසර ගණනාවකට පසු ඇමරිකාවට දැඩි බලපෑම් එල්ල කළ හැකි බවට සඳහන් මිල්ටන් සුළි කුණාටුව ෆ්ලොරිඩාවට ඇතුළු වී තිබෙනවා. එය තුන්වන කාණ්ඩයේ සුළි කුණාටුවක් ලෙස වර්ධනය වී ඇති බවයි අමෙරිකා ජාතික සුළි කුණාටු මධ්‍යස්ථානය සඳහන් කරන්නේ.

මේ හේතුවෙන් නිවාස 125කට ආසන්න සංඛ්‍යාවක් විනාශ වී තිබෙනවා. ප්‍රාන්තයේ මිලියන 2 කට වැඩි පිරිසකට විදුලිය විසන්ධි කර ඇති බවද විදෙස් මාධ්‍ය වාර්තා සඳහන් කරනවා. පැයට කිලෝමීටර් 193ක වේගයෙන් හමා ආ මෙම සුළි කුණාටුව හේතුවෙන් මේ වන විට පුද්ගල මරණ දෙකක් වාර්තා වී තිබෙනවා. එමෙන්ම, පවතින අධික වර්ෂාවත් සමග මිලියන දෙකකට වැඩි ජනතාවක් සඳහා ගංවතුර අනතුරු ඇගවීමක් ද නිකුත් කිරීමට ෆ්ලොරිඩා හී ආපදා අංශ කටයුතු කර තිබෙනවා.