featured news - උණුසුම් පුවත්
මාධ්යවේදී ලසන්ත ඝාතනයට සම්බන්ධ නීතිපති නිර්දේශය අධ්යයනය කරන බව රජය කියයි
මාධ්යවේදී ලසන්ත වික්රමතුංග ඝාතනයට සම්බන්ධ සැකකරුවන් පිළිබඳ නීතිපතිවරයා ලබා දී ඇති තීන්දුව සම්බන්ධයෙන් අධ්යයනය කරමින් සිටින බව රජය පවසයි. අද (05) රජයේ ප්රවෘත්ති දෙපාර්තමේන්තුවේ පැවති මාධ්ය හමුවකදී කැබිනට් ප්රකාශක අමාත්ය නලින්ද ජයතිස්ස මහතා මේ බව සඳහන් කළේය. අදාළ තීන්දුව අධ්යයනය කිරීමෙන් අනතුරුව මේ සම්බන්ධයෙන් ප්රකාශයක් සිදුකරන බවද අමාත්යවරයා මෙහිදී පැවසීය.
මාධ්යවේදී ලසන්ත වික්රමතුංග ඝාතනය සම්බන්ධයෙන් සැකකරුවන් ලෙස නම් කර ඇති හමුදා බුද්ධි නිලධාරියෙකු ඇතුළු තිදෙනෙකු නිදහස් කිරීමට පවතින හැකියාව පිළිබඳ නීතිපතිවරයා අපරාධ පරීක්ෂණ දෙපාර්තමේන්තුවට සිය නීතිමය මතය ලබා දී තිබුණි. පසුගිය ජනවාරි 27 වන දින අපරාධ පරීක්ෂණ දෙපාර්තමේන්තුවේ අධ්යක්ෂකවරයා වෙත යොමු කරන ලද ලිපියක මේ බව සදහන්ය.
