ඉන්ධන මිල සංශෝධනයෙන් පාසල් ප්‍රවාහන ගාස්තු 5%කින් ඉහළට; බස් ගාස්තු වෙනස් නොවේ

ඩීසල් මිල ඉහළ ගිය ද, බස් ගාස්තු සංශෝධනයක් සිදු නොවන බව ජාතික ගමනාගමන කොමිෂන් සභාව පවසනවා.

ඊයේ (09) මධ්‍යම රාත්‍රියේ සිට ඩීසල් මිල ඉහළ ගිය ද, ඉන් බස් ගාස්තු සංශෝධනය සඳහා බලපෑමක් සිදු නොවන බවයි එහි අධ්‍යක්ෂ ජනරාල් ආචාර්ය නිලාන් මිරැන්ඩා සඳහන් කළේ. ඒ අනුව, දැනට පවතින ගාස්තු ඒ අයුරින් පවත්වාගෙන යන බව සඳහන්.

එසේම, පාසල් ළමුන් ප්‍රවාහන ගාස්තු 5% කින් ඉහළ දැමීමට තීරණය කළ බව සමස්ත ලංකා පාසල් ළමුන් ප්‍රවාහන සංගමය පවසනවා. ඒ අනුව, මාසික ගාස්තුව රුපියල් 5,000 ට අඩුවෙන් ලබා ගන්නා අයට රුපියල් 200 ක වැඩිවීමක් හා 5,000ට වැඩියෙන් අය කරන පිරිස් වෙත 5% ක වැඩි වීමක් සිදු කරන බවයි අද (10) පෙරවරුවේ පැවති මාධ්‍ය හමුවකට එක් වෙමින් එම සංගමයේ සභාපති ලලිත් චන්ද්‍රසිරි වැඩිදුරටත් සඳහන් කළේ‍.