රුහුණු සරසවියේ අරඹා තිබූ වර්ජනය උපකුලපති ඉවත් කිරීමත් සමඟ අවසන් වෙයි

රුහුණ විශ්ව විද්‍යාලයේ උපකුලපතිවරයා එම ධූරයෙන් ඉවත් කිරීමත් සමග එම සරසවියේ අරඹා තිබූ වර්ජනය අවසන් කර තිබෙනවා.

ඒ අනුව අද (25) පෙරවරු 7.00 සිට සුපුරුදු පරිදි රාජකාරි සඳහා වාර්තා කරන ලෙස තම සංගමයේ නියෝජිතයින්ට දැනුම් දී ඇති බවයි එම විශ්වවිද්‍යාලයේ ලිපිකාර හා කාර්මික සේවා සංගමයේ සභාපති කැළුම් ගමගේ සඳහන් කළේ.

රුහුණ විශ්වවිද්‍යාලයේ උපකුලපති මහාචාර්ය සුජීව අමරසේන එම තනතුරෙන් ඉවත් කරන ලෙස ඉල්ලා එම සරසවියේ අධ්‍යයන, අනධ්‍යයන සහ ශිෂ්‍ය සංගම් එක්ව පසුගිය 19 වැනිදා සිට වර්ජන ක්‍රියාමාර්ගයක නිරත වී තිබුණා.

පසුව ඊයේ (24) එම සරසවියේ වත්මන් උපකුලපතිවරයා වෙනුවට පරිපාලන කටයුතු අධීක්ෂණය කිරීම සඳහා අද සිට බලපැවැත්වෙන පරිදි නිසි බලධාරියා ලෙස ජ්‍යෙෂ්ඨ මහාචාර්ය ආර්.එම්.යූ.එස්.කේ. රත්නායක පත් කර තිබුණා.